MDMA hunting at Meenadam in Kottayam; Couple and friend nabbed

കോട്ടയം: കോട്ടയത്തെ ഏറ്റവും വലിയ എം.ഡി.എം.എ വേട്ടയിൽ ദമ്പതികളും സുഹൃത്തും പിടിയിൽ. പുതുപ്പള്ളി മീനടം ഇരവുചിറ വെള്ളത്തടത്തിൽ അമൽ ദേവ് എ.കെ (38), ഭാര്യ ശരണ്യ രാജൻ (36), ഇവരുടെ സുഹൃത്ത് ആലപ്പുഴ മാരാരിക്കുളം മായിത്തറ തിരുവിഴ പുകലപ്പുരയ്ക്കൽ രാഹുൽ രാജ് (33) എന്നിവരാണ് പോലീസ് പിടിയിലായത്. 68 ഗ്രാം എംഡിഎംഎയാണ് ഇവരുടെ പക്കൽനിന്നും പിടികൂടിയത്. മീനടത്ത് ഇവർ വാടകക്ക് താമസിക്കുകയായിരുന്നു.

കാറിൽ ലഹരി മരുന്ന് ഒളിപ്പിച്ച് ആവശ്യക്കാർക്ക് എത്തിച്ച് നൽകുന്നതാണ് പതിവ്. പതിവ് പോലെ വിൽപ്പന നടത്തി വീട്ടിൽ തിരിച്ചെത്തിയപ്പോഴാണ് പോലീസിന്റെ പിടിയിലാകുന്നത്. ബാംഗ്ലൂരിൽനിന്നുമാണ് ഇവർ എംഡിഎംഐ എത്തിച്ചത്. പാമ്പാടിയിലും സമീപപ്രദേശങ്ങളിലും ഇവർ എംഡിഎംഐ വിൽപ്പന നടത്തിവരുന്നുന്നെന്ന വിവരം നേരത്തെ ലഭിച്ചിരുന്നു. ഇതിനെത്തുടർന്ന് ദിവസങ്ങളായി ഇവരെ രഹസ്യമായി നിരീക്ഷിച്ചുവരികയായിരുന്നു. അമൽദേവും, രാഹുൽ രാജും വധശ്രമം, ലഹരി വില്പന തുടങ്ങി നിരവധി കേസുകളിൽ നിലവിൽ പ്രതികളാണ്. രാഹുലിന് വാറണ്ടുള്ളതിനാൽ ദമ്പതികളോടൊപ്പം ഇവിടെ ഒളിച്ചു താമസിക്കുകയായിരുന്നു. കോട്ടയം വെസ്റ്റ് പോലീസ് സ്റ്റേഷനിലടക്കം അമലിന് കേസുകളുണ്ട്.

കോട്ടയം ജില്ലാ പോലീസ് മേധാവിക്ക് ലഭിച്ച രഹസ്യ വിവരത്തിൻ്റെ അടിസ്ഥാനത്തിൽ എസ്പിയുടെ ലഹരിവിരുദ്ധസേനയായ ഡാൻസാഫ് സംഘം, പാമ്പാടി പോലീസ്, ഇൻ്റലിജൻസ് വിഭാഗം എന്നിവർ ചേർന്നാണ് ഇവരെ പിടിച്ചത്.

Tags:

MDMA hunting at Meenadam in Kottayam; Couple and friend nabbed

More in Related News