ഭിന്നശേഷി കുട്ടികളുടെ സ്വപ്‌നങ്ങൾക്ക് ചിറകേകാൻ NIARC; പുതിയ അക്കാദമിക് ബ്ലോക്ക് ഉദ്ഘാടനം 17ന്

കോഴിക്കോട്: ഭിന്നശേഷിക്കാരായ കുട്ടികൾക്ക് മികച്ച തെറാപ്പിയും പരിശീലനവും വിദ്യാഭ്യാസ പിന്തുണയും ഉറപ്പാക്കി അവരുടെ കഴിവുകൾ വികസിപ്പിക്കുന്നതിനായി കൊയിലാണ്ടിയിലെ നെസ്റ്റ് ഇന്റർനാഷണൽ അക്കാദമി ആൻഡ് റിസർച്ച് സെന്റർ (NIARC)യിൽ പുതിയ അക്കാദമിക് ബ്ലോക്ക് യാഥാർഥ്യമാകുന്നു. അദീബ്-ഷഫീന ഫൗണ്ടേഷൻ നിർമിച്ചുനൽകുന്ന അക്കാദമിക് ബ്ലോക്കിന്റെ ഉദ്ഘാടനം സെപ്റ്റംബർ 17ന് നടക്കും. ലുലു ഫിനാൻഷ്യൽ ഹോൾഡിങ്സ് മാനേജിങ് ഡയറക്ടർ അദീബ് അഹമ്മദും സംരംഭകയും റിസ് ആർട്ട് ഗാലറി സ്ഥാപകയുമായ ഷഫീന യൂസുഫ് അലിയും ചേർന്നാണ് അക്കാദമിക് ബ്ലോക്ക് നിർമിച്ചുനൽകുന്നത്. രാവിലെ 11.30ന് കൊയിലാണ്ടി പെരുവട്ടൂരിലെ നെസ്റ്റ് ക്യാമ്പസിൽ നടക്കുന്ന ചടങ്ങ് ഷാഫി പറമ്പിൽ എം.പി. ഉദ്ഘാടനം ചെയ്യും. അക്കാദമിക് ബ്ലോക്കിന്റെ ഉദ്ഘാടനം അദീബ് അഹമ്മദും ഷഫീന യൂസുഫ് അലിയും ചേർന്ന് നിർവഹിക്കും. NIARC ചെയർമാൻ അബ്ദുല്ല കരുവഞ്ചേരി അധ്യക്ഷത വഹിക്കും. NIARC ജനറൽ സെക്രട്ടറി ടി.കെ. മുഹമ്മദ് യൂനുസ് സ്വാഗതം പറയും.

ഭിന്നശേഷിക്കാരായ കുട്ടികൾക്ക് ആവശ്യമായ ദന്തപരിചരണം കൂടുതൽ സമഗ്രമാക്കുന്നതിന്റെ ഭാഗമായി ഒരുക്കിയ ദന്തൽ യൂണിറ്റിന്റെ ഉദ്ഘാടനം ജില്ലാ കലക്ടർ എം.എസ്. മാധവിക്കുട്ടി നിർവഹിക്കും. അഡ്വ. പ്രവീൺ കുമാർ എം.എൽ.എ., കൊയിലാണ്ടി നഗരസഭ ചെയർമാൻ യു.കെ. ചന്ദ്രൻ, കെആർഎസ് എം.ഡി. എം.കെ. സിറാജ്, പാരിസൺ ഗ്രൂപ്പ് ഡയറക്ടർ എൻ.കെ. ഖാലിദ്, എംഐസിസി ഡയറക്ടർ പി.പി. അബ്ദുൽ റഷീദ്, വ്യവസായ പ്രമുഖൻ മുജീബുറഹ്‌മാൻ തുടങ്ങിയവർ ചടങ്ങിൽ പങ്കെടുക്കും. വാർത്താ സമ്മേളനത്തിൽ അബ്ദുല്ല കരുവഞ്ചേരി (ചെയർമാൻ, NIARC), ⁠ടി.കെ മുഹമ്മദ് യൂനുസ് (ജനറൽസെക്രട്ടറി, NIARC), ⁠അബ്ദുൽ ഹാലിഖ് (ചെയർമാൻ, കൺസ്ട്രക്ഷൻ കമ്മിറ്റി), ⁠സ്വാലിഹ് ബാത്ത (ഗ്ലോബൽ വൈസ് ചെയർമാൻ, NIARC) എന്നിവർ പങ്കെടുത്തു.

ENLIGHT SNAPS

1. NIARC എന്താണ്?

കൊയിലാണ്ടി പാലിയേറ്റീവ് കെയർ സൊസൈറ്റിയുടെ (KPCS) കീഴിൽ 2012ൽ ആരംഭിച്ച ഭിന്നശേഷിക്കാരായ കുട്ടികളുടെ ചികിത്സ, തെറാപ്പി, പ്രത്യേക വിദ്യാഭ്യാസം, പുനരധിവാസം, കുടുംബ ശാക്തീകരണം എന്നിവ ഏകോപിപ്പിക്കുന്ന മൾട്ടിഡിസിപ്ലിനറി കേന്ദ്രമാണ് NIARC.

2. NIARCന്റെ പ്രധാന ലക്ഷ്യം എന്താണ്?

കുട്ടികളിലെ ഭിന്നശേഷി നേരത്തെ തിരിച്ചറിഞ്ഞ് ആവശ്യമായ ഇടപെടലുകളും പുനരധിവാസവും നൽകുകയും അവരുടെ കഴിവുകൾ പരമാവധി വികസിപ്പിച്ച് ആത്മവിശ്വാസത്തോടെ സമൂഹത്തിന്റെ മുഖ്യധാരയിലേക്ക് എത്തിക്കുകയും ചെയ്യുകയാണ് പ്രധാന ലക്ഷ്യം.

3. NIARCൽ എന്തെല്ലാം സേവനങ്ങളാണ് ലഭിക്കുന്നത്?

ഫിസിയോതെറാപ്പി, ഒക്യുപേഷണൽ തെറാപ്പി, സ്പീച്ച് തെറാപ്പി, ബിഹേവിയറൽ തെറാപ്പി, ഡെവലപ്മെന്റൽ തെറാപ്പി, ക്ലിനിക്കൽ സൈക്കോളജി, പ്രത്യേക വിദ്യാഭ്യാസം, വ്യക്തിഗത വിദ്യാഭ്യാസ പദ്ധതി (IEP), ആക്ടിവിറ്റീസ് ഓഫ് ഡെയ്ലി ലിവിങ് പരിശീലനം തുടങ്ങിയ സേവനങ്ങൾ ലഭ്യമാണ്.

4. NIARC ഗവേഷണത്തിനും മാതാപിതാക്കളുടെ ശാക്തീകരണത്തിനും പ്രാധാന്യം നൽകുന്നത് എന്തുകൊണ്ട്?

ഭിന്നശേഷി മേഖലയിലെ തെളിവാധിഷ്ഠിത ഇടപെടലുകൾ വികസിപ്പിക്കുകയും കുട്ടികളുടെ പുനരധിവാസം കൂടുതൽ ഫലപ്രദമാക്കുകയും ചെയ്യുന്നതിനാണ് ഗവേഷണത്തിന് പ്രാധാന്യം നൽകുന്നത്. കുട്ടികളുടെ പുനരധിവാസത്തോടൊപ്പം മാതാപിതാക്കൾ നേരിടുന്ന മാനസിക, സാമൂഹിക, സാമ്പത്തിക വെല്ലുവിളികൾ മനസ്സിലാക്കി ആവശ്യമായ പിന്തുണ നൽകുന്നതിനും NIARC ശ്രദ്ധിക്കുന്നു.

5. NIARCയുടെ ഭാവി പദ്ധതികൾ എന്തൊക്കെയാണ്?

ഭിന്നശേഷി മേഖലയിലെ പുതിയ കോഴ്‌സുകൾ ആരംഭിക്കുക, Rehabilitation Council of India (RCI) അംഗീകാരം ലക്ഷ്യമിടുക, ദേശീയതലത്തിൽ സെമിനാറുകളും കോൺഫറൻസുകളും സംഘടിപ്പിക്കുക, ഗവേഷണ പ്രവർത്തനങ്ങൾ വിപുലീകരിക്കുക എന്നിവയാണ് പ്രധാന ഭാവി പദ്ധതികൾ.

6. പുതിയ അക്കാദമിക് ബ്ലോക്കിന്റെ ലക്ഷ്യം എന്താണ്?

ഭിന്നശേഷിക്കാരായ കുട്ടികൾക്ക് തെറാപ്പി, പരിശീലനം, വിദ്യാഭ്യാസ പിന്തുണ എന്നിവ കൂടുതൽ സൗകര്യപ്രദമായി ലഭ്യമാക്കുകയും അവരുടെ കഴിവുകൾ വികസിപ്പിച്ച് ആത്മവിശ്വാസത്തോടെ സമൂഹത്തിന്റെ ഭാഗമാകാൻ അവസരമൊരുക്കുകയുമാണ് പുതിയ അക്കാദമിക് ബ്ലോക്കിന്റെ ലക്ഷ്യം. ഏകദേശം ഒന്നരക്കോടി രൂപ ചെലവിൽ അദീബ് അഹമ്മദും ഷഫീന യൂസുഫ് അലിയും ചേർന്നാണ് ബ്ലോക്ക് നിർമിച്ചുനൽകുന്നത്.