Kottayam: A private bus rammed into a KSRTC bus on its way to One Way Road in Kottayam

കോട്ടയം: കോട്ടയത്ത് ഭാരവാഹനങ്ങൾക്ക് യാത്രാ നിരോധനമുള്ള വൺവേ റോഡിലേക്ക് തിരിഞ്ഞ കെഎസ്ആർടിസി ബസിൽ സ്വകാര്യ ബസ് ഇടിച്ചു. കോട്ടയം കെഎസ്ആർടിസി ബസ്റ്റാൻഡിന് സമീപം ടി.ബി റോഡിൽ കല്യാൺ സിൽക്സിന് എതിർ വശത്തുനിന്നും സ്റ്റാർ ജംഷനിലേക്കുള്ള വൺവേ റോഡിലാണ് ശനിയാഴ്ച രാവിലെ അപകടമുണ്ടായത്. കോഴിക്കോട്ടേക്ക് പോവുകയായിരുന്ന കെഎസ്ആർടിസി സൂപ്പർഫാസ്റ്റും ചങ്ങനാശ്ശേരിയിലേക്ക് പോവുകയായിരുന്ന സ്വകാര്യ ബസുമാണ് അപകടത്തിൽപ്പെട്ടത്. ഇരു വാഹനങ്ങൾക്കും സാരമായ കേടു പാടുകൾ സംഭവിച്ചു.

ബസ്സുകൾക്കും ഭാരവാഹനങ്ങൾക്കും യാത്രാ നിരോധനമുള്ള റോഡിലേക്ക്, സ്റ്റാൻഡിൽനിന്നും ഇറങ്ങി വന്ന കെഎസ്ആർടിസി ബസ് അപ്രതീക്ഷിതമായി തിരിഞ്ഞപ്പോൾ പിന്നാലെ എത്തിയ സ്വകാര്യ ബസ് ഇടിക്കാതിരിക്കാൻ വെട്ടിച്ചു. എന്നാൽ ഇറക്കമായതിനാൽ നിയന്ത്രണം വിടുകയും നടപ്പാതയിലേക്ക് സ്വകാര്യ ബസ് കയറ്റി നിർത്തുകയുമായിരുന്നു. ഇതിനാലാണ് വലിയ ആഘാതത്തിലുള്ള കൂട്ടയിടി ഒഴിവായത്. ഇരു ബസുകളിലും നിറയെ യാത്രക്കാരുണ്ടായിരുന്നു. യാത്രക്കാർ കാര്യമായ പരിക്കുകളില്ലാതെ രക്ഷപ്പെട്ടു. ഭാരവാഹനങ്ങൾക്ക് ഗതാഗത നിരോധനമുള്ള റോഡിൽ ഇത് വ്യക്തമാക്കുന്ന ബോർഡ് റോഡിൽനിന്നും മാറ്റിവച്ച ശേഷമാണ് ബസുകൾ വീതി കുറവായ ഈ റേഡിലേക്ക് പ്രവേശിക്കുന്നത്.