Tomorrow, the idol will be installed at the Mahadev Temple in Pothikarai.

തലയോലപ്പറമ്പ്: പൊതി തൃക്കരായിക്കുളം മഹാദേവ ക്ഷേത്ര ത്തിലെ മാർച്ച് 10ന് നടക്കുന്ന പുന:പ്രതിഷ്ഠാചടങ്ങുകളോടു ബന്ധിച്ച് ഞായറാഴ്ച നടന്ന സംഹാരതത്ത്വകലശാഭിഷേകം ഭക്തി സാന്ദ്രമായ അന്തരീക്ഷത്തിൽ താന്ത്രിക പ്രദാനമായ ചടങ്ങുകളോടെ നടന്നു. ജീവ കലശം ശയ്യയിലേക്ക് എഴുന്നള്ളിച്ച് കലശ മണ്ഡപത്തിൽ ധ്യാനാധിവാസം ചെയ്യുന്ന ചടങ്ങിൽ പങ്കെടുക്കാൻ നൂറ് കണക്കിന് ഭക്തജനങ്ങളാണ് ക്ഷേത്രത്തിൽ എത്തിയത്.തന്ത്രി മനയത്താറ്റ്മന ചന്ദ്രശേഖരൻ നമ്പൂതിരി, മേൽശാന്തി കുന്നംപള്ളി നാരായണൻ ഭട്ടതിരി എന്നിവരുടെ മുഖ്യകാർമ്മികത്വത്തിലാണ് പുന:പ്രതിഷ്ഠാ, നവീകരണ കലശ ചടങ്ങു ചടങ്ങുകൾ നടക്കുന്നത്. ഉച്ചയ്ക്ക് നടന്ന പ്രസാദ ഊട്ടിൽ നൂറ് കണക്കിന് ഭക്തജനങ്ങൾ പങ്കെടുത്തു.പുനരുദ്ധാരണ സമിതി പ്രസിഡന്റ് പി.വി.സുരേന്ദ്രൻ, കൺവീനർ എസ്.എൻ.സുരേഷ് സംക്രമത്ത്, ട്രഷറർ ജി.എസ്.വേണുഗോപാൽ, ദേവസ്വം, പുനരുദ്ധാരണ സമിതി അംഗങ്ങൾ തുടങ്ങിയവർ ചടങ്ങുകൾക്ക് നേതൃത്വം നൽകി. മാർച്ച് 10ന് രാവിലെ പീഠ പ്രതിഷ്ഠക്ക് ശേഷം തിരികെ ജീവകലശാദികൾ ശ്രീകോവിലിലേക്ക് എഴുന്നള്ളിച്ച ശേഷം രാവിലെ 10.30നും 12.15നും ഇടയിൽ ബിംബ പ്രതിഷ്ഠ നടക്കും. ബിംബപ്രതിഷ്ഠയ്ക്കു ശേഷം അടയ്ക്കുന്ന ശ്രീകോവിൽ 13 ന് രാവിലെയാണ് തുറക്കുക.

നാളെ വൈകിട്ട് 5.30 ന് വലിയ ബലിക്കല്ല് അധിവാസം നടക്കും. 11 ന് രാവിലെ പരിവാരപ്രതിഷ്ഠ.12 ന് രാവിലെ വിവിധ കലശപൂജ. 13ന് രാവിലെ വിവിധ കലശങ്ങളുടെ അഭിഷേകം, വൈകിട്ട് 6ന് ശേഷം കൊടിയേറ്റ്.18 ന് നടക്കുന്ന ആറാട്ട് എന്നിവയോടെ ഉത്സവം സമാപിക്കും. പുനരുദ്ധാരണ സമിതിയുടെ നേതൃത്വത്തിൽ നവീകരണ പ്രവർത്തനങ്ങളുടെ ഭാഗമായി വൃത്താകൃതിയിൽ രണ്ടു നിലയിലാണു ക്ഷേത്രത്തിലെ ശ്രീകോവിലിന്റെ നിർമ്മാണം പൂർത്തീകരിച്ചത്.