മുംബൈ Rain Alert (Live Update | July 7, 2026)

മുംബൈ: മഹാരാഷ്ട്രയിൽ ഒരാഴ്ചയായി തുടരുന്ന കനത്ത മഴയിൽ വ്യാപക നാശനഷ്ടം. മഴക്കെടുതികളിൽ സംസ്ഥാനത്ത് ഇതുവരെ 15 മരണങ്ങൾ റിപ്പോർട്ട് ചെയ്തു. കനത്ത നാശനഷ്ടം വിതച്ചുകൊണ്ട് മുംബൈ ഉൾപ്പെടെയുള്ള വിവിധ ജില്ലകളിൽ ഇന്നും കാലാവസ്ഥാ വകുപ്പ് 'റെഡ് അലർട്ട്' പ്രഖ്യാപിച്ചിട്ടുണ്ട്. അതിനിടെ, മണ്ണിടിച്ചിലിനെ തുടർന്ന് അടച്ചിട്ടിരുന്ന മുംബൈ-പുണെ എക്സ്പ്രസ് വേയിലെ പ്രശസ്തമായ 'മിസ്സിങ് ലിങ്ക്' ബൈപാസ് 18 മണിക്കൂറുകൾക്ക് ശേഷം ഗതാഗതത്തിനായി തുറന്നുകൊടുത്തു.

മുംബൈ നഗരത്തിൽ മഴക്കെടുതി അതിരൂക്ഷമായി തുടരുകയാണ്. മുൻകരുതൽ നടപടിയുടെ ഭാഗമായി നഗരത്തിലെ മുഴുവൻ വിദ്യാഭ്യാസ സ്ഥാപനങ്ങൾക്കും ഇന്ന് അവധി പ്രഖ്യാപിച്ചു. സ്വകാര്യ കമ്പനികൾ ജീവനക്കാർക്ക് 'വർക്ക് ഫ്രം ഹോം' (Work from Home) അനുവദിക്കണമെന്ന് സംസ്ഥാന ദുരന്തനിവാരണ അതോറിറ്റി നിർദേശിച്ചിട്ടുണ്ട്. അത്യാവശ്യ കാര്യങ്ങൾക്കല്ലാതെ ജനങ്ങൾ പുറത്തിറങ്ങരുതെന്നും മുന്നറിയിപ്പുണ്ട്.

താഴ്ന്ന പ്രദേശങ്ങളിൽ ഇതുവരെ വെള്ളം കയറിത്തുടങ്ങിയിട്ടില്ലെങ്കിലും നഗരത്തിൽ വലിയ ഗതാഗതക്കുരുക്കാണ് അനുഭവപ്പെടുന്നത്. വരും മണിക്കൂറുകളിൽ നാസിക്കിൽ അതിതീവ്ര മഴയ്ക്കും മിന്നൽ പ്രളയത്തിനും സാധ്യതയുണ്ടെന്ന് എക്സ് (X) പ്ലാറ്റ്‌ഫോമിലൂടെ മുഖ്യമന്ത്രി അറിയിച്ചു. ശക്തമായ കാറ്റിൽ മരങ്ങൾ കടപുഴകി വീഴാൻ സാധ്യതയുള്ളതിനാൽ ജനങ്ങൾ ജാഗ്രത പാലിക്കണമെന്നും, സർക്കാർ രക്ഷാപ്രവർത്തനങ്ങൾക്കായി പരമാവധി ശ്രമിക്കുന്നുണ്ടെന്നും മുഖ്യമന്ത്രിയുടെ ഓഫീസ് വ്യക്തമാക്കി. നാളെയും മഹാരാഷ്ട്രയിൽ ശക്തമായ മഴ തുടരുമെന്നാണ് കാലാവസ്ഥാ വകുപ്പിൻ്റെ പ്രവചനം.

മലപ്പുറത്ത് പോസ്റ്റ് ഒടിഞ്ഞ് വീണ് കെഎസ്ഇബി ജീവനക്കാരന് ദാരുണാന്ത്യം

ഗതാഗതം പുനഃസ്ഥാപിച്ച് 'മിസ്സിങ് ലിങ്ക്'

സഹ്യാദ്രി മലനിരകളിലൂടെ കടന്നുപോകുന്ന മിസ്സിങ് ലിങ്കിലെ ഏറ്റവും വലിയ തുരങ്കമായ 'ടണൽ രണ്ട്' (Tunnel 2)-ൻ്റെ എക്സിറ്റിന് സമീപം ഞായറാഴ്ച പുലർച്ചെ നാലോടെയാണ് മണ്ണിടിച്ചിലുണ്ടായത്. വലിയ പാറകളും മണ്ണും വെള്ളവും കുത്തിയൊലിച്ചെത്തി, തുരങ്കത്തിന് മുകളിൽ മഴവെള്ളം തിരിച്ചുവിടാൻ നിർമിച്ച സംരക്ഷണ ഭിത്തിയുടെ ഒരു ഭാഗം തകരുകയായിരുന്നു. ഇതേത്തുടർന്ന് മുംബൈയിലേക്കുള്ള പാത പൂർണമായും അടച്ചു. എന്നാൽ തുരങ്കത്തിന് ഘടനാപരമായ തകരാറുകൾ (Structural damage) സംഭവിച്ചിട്ടില്ലെന്ന് മഹാരാഷ്ട്ര സ്റ്റേറ്റ് റോഡ് ഡെവലപ്മെൻ്റ് കോർപറേഷൻ (MSRDC) അറിയിച്ചു.

സുരക്ഷാ പരിശോധനകൾ പൂർത്തിയാക്കിയ ശേഷം തിങ്കളാഴ്ച രാത്രി 10.10ഓടെയാണ് വാഹനഗതാഗതം ഭാഗികമായി പുനഃസ്ഥാപിച്ചത്. പുണെയിൽ നിന്ന് മുംബൈയിലേക്കുള്ള ഇടത് ഭാഗത്തെ രണ്ട് വരി പാതകളാണ് ഇപ്പോൾ തുറന്നുകൊടുത്തത്. മലമുകളിൽ നിന്നുള്ള വെള്ളം ഇപ്പോഴും റോഡിലേക്ക് ഒഴുകിയെത്തുന്നതിനാൽ വലത് ഭാഗത്തെ വരി അടച്ചിട്ടിരിക്കുകയാണ്. പാത അടച്ച സമയത്ത് മുംബൈയിലേക്കുള്ള വാഹനങ്ങൾ ലോണാവാല ഘട്ട് വഴിയുള്ള പഴയ എക്സ്പ്രസ് വേയിലൂടെ തിരിച്ചുവിട്ടിരുന്നുവെങ്കിലും കനത്ത വെള്ളക്കെട്ടും മണ്ണിടിച്ചിലും കാരണം പകൽ സമയത്ത് ഇവിടെ വലിയ ഗതാഗതക്കുരുക്ക് രൂപപ്പെട്ടിരുന്നു.

വൈക്കത്ത് തർക്കത്തെ തുടർന്ന് തലയ്ക്ക് അടിയേറ്റ് കോട്ടയം മെഡിക്കൽ കോളേജ് ആശുപത്രിയിൽ ചികിത്സയിലായിരുന്ന യുവാവ് മരിച്ചു.

പ്രതികൂല കാലാവസ്ഥയും ഡ്രോൺ സർവേയും

തുടർച്ചയായ കനത്ത മഴയും ശക്തമായ കാറ്റും കനത്ത മഞ്ഞും കാരണം പരിശോധനകൾ നീണ്ടുപോയതാണ് പാത തുറക്കാൻ വൈകിയതെന്ന് ഉദ്യോഗസ്ഥർ വിശദീകരിച്ചു. സുരക്ഷാ മുൻകരുതലിന്റെ ഭാഗമായി ഡ്രോൺ സർവേ നടത്താൻ ശ്രമിച്ചെങ്കിലും മോശം കാഴ്ചപരിധി (Poor visibility) കാരണം അത് സാധ്യമായില്ല. തുടർന്ന് സാങ്കേതിക വിദഗ്ധർ നേരിട്ടെത്തി ചരിവുകളിൽ ഇളകിക്കിടക്കുന്ന പാറകളില്ലെന്ന് ഉറപ്പുവരുത്തിയ ശേഷമാണ് തുരങ്കം തുറന്നത്. പ്രതികൂല കാലാവസ്ഥയിലും പാത സുരക്ഷിതമായി തുറക്കാൻ കോർപറേഷൻ്റെ സംഘം നിരന്തരം പ്രയത്നിച്ചതായി MSRDC എക്സിൽ കുറിച്ചു.

കഴിഞ്ഞ മെയ് ഒന്നിന് ഗതാഗതത്തിനായി തുറന്നുകൊടുത്ത മിസ്സിങ് ലിങ്ക്, 94 കിലോമീറ്റർ ദൈർഘ്യമുള്ള എക്സ്പ്രസ് വേയിലെ 13.3 കിലോമീറ്റർ വരുന്ന പുതിയ പാതയാണ്. രണ്ട് ഇരട്ട തുരങ്കങ്ങളും ഒരു കേബിൾ സ്റ്റേഡ് പാലവും ഉൾപ്പെടുന്ന ഈ ആധുനിക പാത ലോണാവാല-ഖണ്ടാല ഘട്ട് മേഖലയെ ഒഴിവാക്കി യാത്രാദൂരം 5.7 കിലോമീറ്റർ കുറയ്ക്കാനും, യാത്രാസമയം 20 മുതൽ 30 മിനിറ്റ് വരെ ലാഭിക്കാനും സഹായിക്കുന്ന ഒന്നാണ്.

ആഗോള സൂചനകൾക്കിടെ ഇന്ത്യൻ വിപണി; ബാങ്കിംഗ്, AI, സ്വർണം ഇന്ന് ശ്രദ്ധാകേന്ദ്രത്തിൽ