വിദ്യാർത്ഥിനിക്ക് സ്നേഹവീട്; താക്കോൽ കൈമാറ്റം ഏപ്രിൽ 1ന്

Student's love home; key transfer on April 1

കുന്ദമംഗലം: കുന്ദമംഗലം ഹൈസ്കൂളിലെ ഒമ്പതാം ക്ലാസ് വിദ്യാർത്ഥിനിക്ക് സ്നേഹത്തിന്റെ കൈത്താങ്ങായി നിർമിച്ച വീടിന്റെ താക്കോൽ കൈമാറ്റം ഏപ്രിൽ ഒന്നിന് നടക്കും. പ്രമുഖ വ്യക്തികളുടെ സാന്നിധ്യത്തിൽ കുന്ദമംഗലം പൊലീസ് സ്റ്റേഷൻ ഹൗസ് ഓഫീസർ എസ്. കിരൺ താക്കോൽ കൈമാറും.

വിദ്യാർത്ഥിനിയുടെ പിതാവ് വീടിന്റെ നിർമ്മാണം പകുതിയായിരിക്കെ ഉണ്ടായ വാഹനാപകടത്തിൽ മരണപ്പെട്ടതോടെയാണ് കുടുംബം വലിയ ദുരിതത്തിലായത്. അപകടത്തിൽ അമ്മയ്ക്കും ഗുരുതരമായി പരിക്കേറ്റതിനെ തുടർന്ന് അവർ ഇപ്പോഴും ചികിത്സയിൽ കഴിയുകയാണ്. ഇതോടെ കുടുംബത്തിന്റെ ആശ്രയമായിരുന്ന പിതാവിന്റെ നഷ്ടവും സാമ്പത്തിക പ്രതിസന്ധിയും കാരണം വീടിന്റെ നിർമ്മാണം നിലച്ചുപോയിരുന്നു.

ഈ സാഹചര്യത്തിൽ വിദ്യാർത്ഥിനിയുടെ ദുരിതം മനസ്സിലാക്കിയ കുന്ദമംഗലം ഹൈസ്കൂളിലെ അധ്യാപകരും വിദ്യാർത്ഥികളും പൂർവ്വ വിദ്യാർത്ഥികളും നാട്ടുകാരും ചേർന്ന് സഹായഹസ്തം നീട്ടി. വീടിന്റെ നിർമാണം പൂർത്തിയാക്കുന്നതിനായി സ്കൂൾതലത്തിൽ സഹായ സമാഹരണം സംഘടിപ്പിക്കുകയും വിദ്യാർത്ഥികളിൽ നിന്നും പൂർവ്വ വിദ്യാർത്ഥികളിൽ നിന്നുമാണ് പ്രധാനമായും ധനസഹായം ശേഖരിക്കുകയും ചെയ്തു. നിരവധി സന്നദ്ധപ്രവർത്തകരുടെയും നാട്ടുകാരുടെയും പിന്തുണയോടെ വീടിന്റെ നിർമ്മാണം പൂർത്തിയാക്കാനായി.

പ്രധാന അധ്യാപകൻ പ്രവീൺ ചെയർമാനും പി.ടി.എ പ്രസിഡന്റ് ടി.പി. നിധീഷ് കൺവീനറുമായ കമ്മിറ്റിയാണ് പ്രവർത്തനങ്ങൾക്ക് നേതൃത്വം നൽകിയത്. ദുരിതത്തിലായ ഒരു വിദ്യാർത്ഥിനിക്ക് സുരക്ഷിതമായ ഒരു വീടൊരുക്കുക എന്ന ലക്ഷ്യത്തോടെ സ്കൂൾ സമൂഹം നടത്തിയ ഈ കൂട്ടായ പരിശ്രമം മനുഷ്യസ്നേഹത്തിന്റെ മാതൃകയായാണ് വിലയിരുത്തപ്പെടുന്നത്.

ഏപ്രിൽ ഒന്നിന് നടക്കുന്ന ചടങ്ങിൽ സാമൂഹിക, വിദ്യാഭ്യാസ, സാംസ്കാരിക രംഗങ്ങളിലെ പ്രമുഖരും പ്രദേശവാസികളും പങ്കെടുക്കും.