പരിമിതികളെ ചുവടുകളാക്കി വേദികളിൽ വിസ്മയമായി റുക്‌സാന ; ഒപ്പം തൃശൂർ 'ടീം പൂമ്പാറ്റ'യുടെ ഫാഷൻ ഷോ ചുവടുകളും

Thrissur 'Team Poompatta' Fashion Show Steps

തിരൂരങ്ങാടി : ജീവിതം നൽകിയ പരിമിതികളെ നാല് ചുമരുകൾക്കുള്ളിൽ ഒതുക്കി നിർത്താതെ, ഭിന്നശേഷിത്വം എന്നത് കുറവുകളല്ല മറിച്ച് വ്യത്യസ്ത കഴിവുകളുടെ നിറകുടമാണെന്ന് സമൂഹത്തിന് കാട്ടിക്കൊടുക്കുകയാണ് റുക്‌സാന എന്ന കൊച്ചു കലാകാരി. ബൗദ്ധിക വെല്ലുവിളികളെ പുഞ്ചിരിയോടെ നേരിട്ട്, കലാരംഗത്ത് തന്റേതായ മുദ്ര പതിപ്പിച്ചു കൊണ്ടിരിക്കുന്ന ഈ പതിമൂന്നുകാരി ഇന്ന് ഭിന്നശേഷി സമൂഹത്തിന് ഒന്നടങ്കം വലിയൊരു പ്രചോദനമാണ്.

ചെമ്മാട് തൃക്കുളം ജി.എച്ച്.എസ്.എസിലെ ആറാം ക്ലാസ് വിദ്യാർത്ഥിനിയായ റുക്‌സാന ഇതിനകം തന്നെ കേരളത്തിനകത്തും പുറത്തുമായി നിരവധി വേദികളിൽ തന്റെ കഴിവ് തെളിയിച്ചിട്ടുണ്ട്. സിനിമറ്റിക് ഡാൻസ്, നാടോടിനൃത്തം തുടങ്ങിയ ഇനങ്ങളിൽ തിളങ്ങിയ റുക്‌സാനയ്ക്ക് ഫാഷൻ ഷോ രംഗത്തും വലിയ കൈയടിയാണ് ലഭിക്കുന്നത്. തൃശൂർ ആസ്ഥാനമായുള്ള 'ടീം പൂമ്പാറ്റ'യാണ് റുക്‌സാനയെ റാംപിലെ ഫാഷൻ ഷോ ചുവടുകളിലേക്ക് കൈപിടിച്ചുയർത്തിയത്. ഈ കൂട്ടായ്മയുടെ മികച്ച പ്രോത്സാഹനവും പിന്തുണയുമാണ് ഫാഷൻ ലോകത്ത് ഈ കൊച്ചുമിടുക്കിയെ വേറിട്ടുനിർത്തിയത്. റുക്‌സാന ഓരോ വേദിയിലെത്തുമ്പോഴും സദസ്സിൽ നിന്ന് ഉയരുന്ന കൈയടികൾ ഈ പ്രതിഭയ്ക്കുള്ള ഏറ്റവും വലിയ അംഗീകാരമാണ്.

കൊടിഞ്ഞി സ്വദേശി കൊളത്തൂർ റഫീഖിന്റെയും, തിരുവനന്തപുരം പേരൂർക്കട സ്വദേശി റസീന സഫിയ ബീഗത്തിന്റെയും മകളാണ് റുക്‌സാന. മകളുടെ താല്പര്യങ്ങൾ തിരിച്ചറിഞ്ഞ്, എന്തിനും ഏതിനും കരുത്തായി കൂടെനിൽക്കുന്ന ഈ മാതാപിതാക്കൾ സമൂഹത്തിന് വലിയൊരു മാതൃകയാണ്. മാതാപിതാക്കളുടെ പ്രോത്സാഹനത്തിന് പുറമെ, സ്പെഷ്യൽ എഡ്യൂക്കേറ്റർ കൂടിയായ സഹോദരി ഐഷത്ത് അസ്ബിന്റെ നിരന്തരമായ പ്രയത്നവും മാർഗ്ഗനിർദ്ദേശവുമാണ് റുക്‌സാനയുടെ ഈ കുതിപ്പിന് പിന്നിലെ പ്രധാന ഇന്ധനം.

ശാരീരിക-ബൗദ്ധിക പരിമിതികളുടെ പേരിൽ മക്കളെ മാറ്റിനിർത്തുന്ന സമൂഹത്തിന് മുന്നിൽ, കൃത്യമായ പിന്തുണയും പ്രചോദനവും നൽകിയാൽ ഏതൊരു കുട്ടിക്കും ഉയരങ്ങൾ കീഴടക്കാൻ സാധിക്കുമെന്ന് തെളിയിക്കുകയാണ് റുക്‌സാനയും ഈ കുടുംബവും. ഇനിയും ഒരുപാട് വലിയ വേദികളിലേക്ക് ചുവടുവെക്കാനുള്ള വലിയ തയ്യാറെടുപ്പിലാണ് ഈ കൊച്ചു മിടുക്കി.

അവാർഡുകളുടെ തിളക്കത്തിൽ ഈ കൊച്ചുപ്രതിഭ

തന്റെ കലാപരമായ മികവിന് ചുരുങ്ങിയ കാലം കൊണ്ട് നിരവധി പുരസ്കാരങ്ങളാണ് റുക്‌സാന സ്വന്തമാക്കിയത് വിഭിന്നം അവാർഡ് (2024), സ്പെഷ്യൽ കാലിബർ അവാർഡ് (2025), ടീം പൂമ്പാറ്റയുടെ റൈസിംഗ് സ്റ്റാർ അവാർഡ് (2025) എന്നി പുരസ്കാരങ്ങൾ ഈ കൊച്ചു മിടുക്കി കരസ്‌ഥമാക്കി.

Tags:

enlightmedia,malayalamnews,kerala,latestnews