Three years wage arrears; Vaikom Taluk Supplyco godown workers have started an indefinite strike.

തലയോലപ്പറമ്പ്: മൂന്ന് വർഷത്തെ വേതന കുടിശിഖ വിതരണം ചെയ്യണമെന്ന് ആവശ്യപ്പെട്ട് വൈക്കം താലൂക്ക് സപ്ലൈകോ ഗോഡൗൺ തൊഴിലാളികൾ അനിശ്ചിതകാല സമരം ആരംഭിച്ചു. സംയുക്ത ട്രേഡ് യൂണിയൻ്റെ നേതൃത്വത്തിലാണ് പണിമുടക്ക് സമരം തുടങ്ങിയത്.2021 മുതൽ 2023 വരെയുള്ള കാലയളവിലെ കുടിശിഖയായ 16.73 ലക്ഷം രൂപ വിതരണം ചെയ്യണമെന്ന് ആവശ്യപ്പെട്ട് ഈ മാസം ആദ്യം തൊഴിലാളികൾ സൂചനപണിമുടക്ക് നടത്തിയിരുന്നു.തുടർന്ന് ചർച്ചയിൽ ഈ മാസം 28ന് മുമ്പായി പരിഹരിക്കാമെന്ന് റീജണൽ മാനേജർ ഉൾപ്പടെ അധികൃതർ ഉറപ്പ് നൽകിയെങ്കിലും പാലിക്കാതെ വന്നതോടെയാണ് സംയുക്ത ട്രേഡ് യൂണിയൻ്റെ നേതൃത്വത്തിൽ ക്ഷേമനിധി ബോർഡിന് കീഴിലുള്ള 33 ഓളം തൊഴിലാളികൾ അനിശ്ചിതകാല സമരവുമായി രംഗത്തെത്തിയത്. തലയോലപ്പറമ്പിലുള്ള സപ്ലൈകോ ഗോഡൗണിന് മുന്നിൽ നടന്ന സമരത്തിൽ ട്രേഡ് യൂണിയൻ നേതാക്കളായ അഡ്വ.പി.വി സുരേന്ദ്രൻ, കെ.എസ് രത്നാകരൻ, സജിമോൻ വർഗ്ഗീസ്, എം.കെ ദാസൻ തുടങ്ങിയവർ പ്രസംഗിച്ചു.അനിശ്ചിതകാല സമരം ആരംഭിച്ചതോടെ താലൂക്കിലെ 18 ഔട്ട്ലെറ്റുകളിലേക്കുള്ള ഭക്ഷ്യധാന്യങ്ങളുടെ വിതരണം തടസ്സപ്പെട്ടു.