ഖത്തറിലും യുപിഐ പണമിട‌പാടിനുള്ള സൗകര്യം.

14 Jul 2024 05:43 IST

Share News :

Facility for UPI Money Transfer in Qatar also.

ദോഹ: ഖത്തറിലെ ഇന്ത്യക്കാർക്ക് ഇനി ക്യു.ആര്‍ കോഡ് സ്കാൻ ചെയ്ത് യു.പി.ഐ വഴി പേയ്‌മെൻ്റുകൾ നടത്താൻ കഴിയും. ഖത്തർ ആസ്ഥാനമായി പ്രവർത്തിക്കുന്ന മിഡിൽ ഈസ്റ്റിലെയും ആഫ്രിക്കയിലെയും ഏറ്റവും വലിയ ധനകാര്യ സ്ഥാപനമായ ഖത്തർ നാഷനൽ ബാങ്കുമായി സഹകരിച്ച് എൻ.പി.സി.ഐ ഇൻ്റർനാഷണൽ പേയ്‌മെൻ്റ് (NIPL) കരാർ ഒപ്പിട്ടതിനെ തുടർന്നാണ് ഈ സൗകര്യം.

ഇന്ത്യക്കാർക്ക് തങ്ങളുടെ ഇന്ത്യൻ ബാങ്ക് അക്കൗണ്ടുകളുമായി ബന്ധിപ്പിച്ച യു.പി.ഐ ആപ് ഉപയോഗിച്ചു തന്നെ ഷോപ്പിങ് ഉൾപ്പെടെ സൗകര്യങ്ങൾ ഒരുക്കുന്നതാണ് പുതിയ നീക്കം.

ഖത്തറിലെ ഇന്ത്യന്‍ പ്രവാസികള്‍ക്കും വിനോദ സഞ്ചാരികള്‍ക്കും ഗൂഗ്ൾ പേ, ഫോൺ പേ ഉൾപ്പെടെ പേമെൻറ് ആപ് വഴി ഇങ്ങനെ രാജ്യത്തുടനീളം പണമിടപാട് നടത്താം. റസ്റ്റാറൻറുകൾ, റീട്ടെയില്‍ ഷോപ്പുകള്‍, ടൂറിസ്റ്റ് കേന്ദ്രങ്ങള്‍, ഡ്യൂട്ടി ഫ്രീ ഷോപ്പുകള്‍ എന്നിവിടങ്ങളിലെല്ലാം സേവനം ലഭ്യമാകും. സന്ദർശകരും ട്രാൻസിറ്റ് യാത്രക്കാരും ഉൾപ്പെടെ ഖത്തറിലെ വലിയൊരു വിഭാഗം ഇന്ത്യക്കാർക്ക് തങ്ങളുടെ ഇടപാടുകൾ ഏറ്റവും വേഗത്തിൽ സാധ്യമാക്കുന്നതാണ് പുതിയ കരാറെന്ന് എൻ.പി.സി.ഐ ഡെപ്യൂട്ടി ചീഫ് അനുഭവ് ശർമ പറഞ്ഞു. ജൂൺ അവസാന വാരത്തിൽ യു.പി.ഐ സേവനം യു.എ.ഇയിലും നിലവിൽ വന്നിരുന്നു. മിഡിലീസ്റ്റ്, ആഫ്രിക്ക ഉൾപ്പെടെ 28 രാജ്യങ്ങളിലായി ഏറ്റവും വലിയ ബാങ്കിങ് ശൃംഖലയാണ് ഖത്തർ നാഷനൽ ബാങ്ക്.