Complaint of extorting money from many people by offering home appliances for half the price in Kaduthuruthy, Kottayam.

വൈക്കം: പകുതി വിലയ്ക്ക് ഗൃഹാപകരണങ്ങൾ വാഗ്ദാനം ചെയ്ത് പണം തട്ടിയതായി പരാതി. കടുത്തുരുത്തിക്ക് സമീപം സ്ഥാപനം നടത്തുന്ന ഒരു വ്യാപാരി മുഖേനെയാണ് പലരിൽ നിന്ന് പണം തട്ടിയതായി കടുത്തുരുത്തി പോലീസിൽ തട്ടിപ്പിന് ഇരയായവർ പരാതി നൽകിയത്. മൊബൈൽ ഫോൺ ഉൾപ്പെടെയുള്ള ഗൃഹോപകരണങ്ങൾ കമ്പനി വിലയുടെ പകുതി തുക ഗഡുക്കളായി നൽകിയാൽ മതിയെന്ന് വാഗ്ദാനം ചെയ്തായിരുന്നു തട്ടിപ്പ്. സാധനങ്ങളുടെ വില അനുസരിച്ച് ഒരു തുക ആദ്യഗഡുവായി നൽകുകയും പിന്നീട് 12 മാസത്തിനുള്ളിൽ പല ഗഡുക്കളായി നൽകിയാൽ മതിയെന്നായിരുന്നു ഇവർ വാഗ്ദാനം ചെയ്തത്. ഇതനുസരിച്ച് ടി.വി, വാഷിങ്ങ് മെഷീൻ , മോബൈൽ ഫോൺ ഉൾപ്പെടെയുള്ള ഗൃഹോപകരണങ്ങൾക്ക് വ്യാപാരി പറഞ്ഞതനുസരിച്ച് മറ്റൊരാളുടെ ഗൂഗിൽ പേ നംബറിലേക്ക് തട്ടിപ്പിനിരയായവർ പണമയച്ച് നൽകുകയായിരുന്നു. 16-ാം തീയതി രാത്രി ഏഴ് മണിക്ക് ലോഡ് വരുമ്പോൾ കടയിൽ നിന്ന് സാധനങ്ങൾ നൽകുമെന്നായിരുന്നു വാഗ്ദാനം. രാത്രി 11 മണി വരെ കാത്തിരുന്നിട്ടും സാധനങ്ങൾ കിട്ടാതിരുന്നതോടെ ഇവരുമായി ബന്ധപ്പെട്ട ഫോണുകളിലേക്ക് പണം നൽകിയവർ വിളിച്ചെങ്കിലും ഫോൺ സ്വിച്ച് ഓഫ് ചെയ്ത നിലയിലായിരുന്നു.തുടർന്ന്

തട്ടിപ്പ് മനസ്സിലാക്കി പണം നഷ്ടപ്പെട്ടവർ കടുത്തുരുത്തി പോലീസിൽ പരാതിനൽകുകയായിരുന്നു. എട്ടോളം പേരാണ് നിലവിൽ പരാതി നൽകിയിട്ടുള്ളത്. കൂടുതൽ പേർ തട്ടിപ്പിന് ഇരയായിട്ടുള്ളതിനാൽ കൂടുതൽ പരാതികൾ ഇനിയും എത്തിയേക്കും.