ഹോബികളിൽ വിരിഞ്ഞ ലോകറെക്കോർഡ്; പേപ്പർ കപ്പുകളുടെ ശേഖരണവുമായി ഗിന്നസ് തിളക്കത്തിൽ സുനിൽ ജോസഫ്

ഇടുക്കി:

നമ്മളിൽ പലർക്കും കുട്ടിക്കാലത്ത് പലവിധത്തിലുള്ള ഹോബികൾ ഉണ്ടാകാറുണ്ട്. എന്നാൽ പ്രായമേറുന്തോറും തിരക്കുകൾക്കിടയിൽ ആ ശീലങ്ങൾ പലരും മറന്നുപോകും. അതിൽ നിന്നെല്ലാം വ്യത്യസ്തനായി, തൻ്റെ ആജീവനാന്ത ശേഖരണ ശീലത്തെ ഒരു ലോക റെക്കോർഡാക്കി മാറ്റി മാതൃകയായിരിക്കുകയാണ് സുനിൽ ജോസഫ് എന്ന 57 കാരൻ. ഭൂമിയിലെ ഏറ്റവും വലിയ പേപ്പർ കപ്പുകളുടെ ശേഖരമെന്ന അപൂർവ്വ നേട്ടമാണ് ഈ ഇന്ത്യൻ സ്വദേശി ഇപ്പോൾ സ്വന്തമാക്കിയിരിക്കുന്നത്.

ലോകത്തിൻ്റെ വിവിധ കോണുകളിൽ നിന്നുള്ള 858 പേപ്പർ കപ്പുകളാണ് സുനിൽ ജോസഫിൻ്റെ ശേഖരത്തിലുള്ളത്. കേവലം എണ്ണത്തിൽ മാത്രമല്ല, ഈ ശേഖരത്തിൻ്റെ വൈവിധ്യവും നമ്മെ അത്ഭുതപ്പെടുത്തും. 31 വ്യത്യസ്ത രാജ്യങ്ങളിൽ നിന്നായി ശേഖരിച്ച, വെറും 5 മില്ലിലിറ്റർ മാത്രം വലിപ്പമുള്ള കുഞ്ഞൻ കപ്പുകൾ മുതൽ 500 മില്ലിലിറ്റർ വരെയുള്ള വലിയ കപ്പുകൾ വരെ ഈ വിസ്മയ ശേഖരത്തിലുണ്ട്.

 ഒരു സാമൂഹിക പ്രവർത്തകനും രണ്ട് കുട്ടികളുടെ പിതാവുമായ സുനിൽ ജോസഫിൻ്റെ ഈ ശേഖരണ ഭ്രമം ഇന്നോ ഇന്നലെയോ തുടങ്ങിയതല്ല. അഞ്ചാം ക്ലാസിൽ പഠിക്കുന്ന കാലത്ത് സ്റ്റാമ്പുകൾ, നാണയങ്ങൾ, തീപ്പെട്ടിപ്പടങ്ങൾ (മാച്ച്ബോക്സ് സ്റ്റിക്കറുകൾ) എന്നിവ കൗതുകത്തോടെ ഒളിപ്പിച്ചു വെച്ചായിരുന്നു തുടക്കം. പ്രായത്തോടൊപ്പം വളർന്ന ആ അഭിനിവേശം പിന്നീട് റേസർബ്ലേഡ് കവറുകൾ, വിമാന ബോർഡിംഗ് പാസുകൾ, കോഫി മഗ്ഗുകൾ, ടീ ബാഗുകൾ എന്നിവയിലേക്കും വ്യാപിപ്പിച്ചു. ദശാബ്ദങ്ങളായി തുടരുന്ന ഈ കഠിനാധ്വാനമാണ് അദ്ദേഹത്തെ റെക്കോർഡുകളുടെ നെറുകയിൽ എത്തിച്ചത്.

സുനിൽ ജോസഫിനെ തേടിയെത്തുന്ന ആദ്യത്തെ ലോക റെക്കോർഡല്ല ഇത്. ഇതിനുമുമ്പ് 2013-ൽ 245 രാജ്യങ്ങളിലെ 5,986 ഫോൺ കാർഡുകളുടെ ഏറ്റവും വലിയ ശേഖരം കെട്ടിപ്പടുത്തുകൊണ്ട് അദ്ദേഹം തൻ്റെ ആദ്യ ഗിന്നസ് റെക്കോർഡ് സ്വന്തമാക്കിയിരുന്നു. പിന്നീട് 8,000-ത്തിലധികം ഫോൺ കാർഡുകൾ ശേഖരിച്ച ഒരു കനേഡിയൻ സ്വദേശി ഈ റെക്കോർഡ് ഭേദിച്ചെങ്കിലും, തോറ്റുകൊടുക്കാൻ സുനിൽ തയ്യാറായിരുന്നില്ല. 

ആ വാശിയാണ് ഇപ്പോൾ പേപ്പർ കപ്പുകളിലൂടെ രണ്ടാമതൊരു ഗിന്നസ് റെക്കോർഡ് കൂടി അദ്ദേഹത്തിൻ്റെ അക്കൗണ്ടിൽ എത്തിച്ചത്. 2021-ൽ800 കപ്പുകൾ ശേഖരിച്ച ന്യൂയോർക്ക് സ്വദേശി വുഡിൽ റാഫേലിൻ്റെ റിക്കാർഡാണ് സുനിൽ തകർത്തത്

തൻ്റെ ഈ വലിയ നേട്ടത്തിന് പിന്നിൽ ലോകമെമ്പാടുമുള്ള സുഹൃത്തുക്കളുടെയും ബന്ധുക്കളുടെയും വലിയൊരു പിന്തുണയുണ്ടെന്ന് സുനിൽ ജോസഫ് നന്ദിയോടെ സ്മരിക്കുന്നു. തങ്ങൾ കാണുന്ന വ്യത്യസ്തമായ പേപ്പർ കപ്പുകൾ തപാലിലൂടെ അദ്ദേഹത്തിന് അയച്ചു നൽകി അവരെല്ലാം ഈ റെക്കോർഡ് യാത്രയിൽ പങ്കാളികളാവുകയായിരുന്നു.

തൻ്റെ ഈ അപൂർവ്വ ശേഖരം വെറുതെ വീട്ടിൽ പൂട്ടിയിടാൻ അദ്ദേഹം ആഗ്രഹിക്കുന്നില്ല. കുട്ടികളിലും യുവാക്കളിലും ഇത്തരം നല്ല ശീലങ്ങൾ വളർത്തിയെടുക്കുന്നതിനായി സ്കൂളുകളിലും കോളേജുകളിലും അദ്ദേഹം പതിവായി പ്രദർശനങ്ങൾ സംഘടിപ്പിക്കാറുണ്ട്.ലോക റെക്കോർഡുകൾ എന്നത് സാധാരണക്കാർക്ക് എത്തിപ്പിടിക്കാൻ കഴിയാത്ത ഒന്നാണെന്ന് ചിന്തിക്കുന്നവരോട് അദ്ദേഹത്തിന് പറയാനുള്ളത് ഇത്രമാത്രം:

"നിങ്ങളുടെ അഭിനിവേശത്തോട് എപ്പോഴും പ്രതിബദ്ധതയുള്ളവരായിരിക്കുക, അങ്ങനെയാണെങ്കിൽ നിങ്ങൾ വിനോദമായി കാണുന്ന ഒരു ചെറിയ കാര്യം പോലും നാളെ 'ആഗോള അംഗീകാരത്തിൻ്റെ പൈതൃകമായി' മാറും."