NM Vijayan's death: Police conducts raid at DCC office in Wayanad

മാനന്തവാടി : എൻ എം വിജയന്‍റെ ആത്മഹത്യാ കേസില്‍ വയനാട് ഡിസിസി ഓഫീസില്‍ പൊലീസ് പരിശോധന. ചോദ്യംചെയ്യുന്നതിനിടെ ഡിസിസി പ്രസിഡൻറ് എൻ ഡി അപ്പച്ചനുമായി എത്തിയാണ് പൊലീസ് രേഖകള്‍ പരിശോധിച്ചത്. എൻ ഡി അപ്പച്ചന്റെയും കെ കെ ഗോപിനാഥന്റെയും ചോദ്യംചെയ്യല്‍ രണ്ടാം ദിവസം തുടരുന്നതിനിടെയാണ് പൊലീസ് ഡിസിസി ഓഫീസില്‍ എത്തിയത്. ബത്തേരി ഡിവൈഎസ്പി അബ്ദുള്‍ ഷെരീഫിന്റെ നേതൃത്വത്തിലുള്ള അന്വേഷണസംഘം മൂന്നു മണിയോടെ എത്തി 20 മിനിറ്റോളം നേരം ഡിസിസി ഓഫീസില്‍ പരിശോധന നടത്തി. ചോദ്യം ചെയ്തിരുന്ന ഡിസിസി പ്രസിഡന്‍റ് അപ്പച്ചനെയും ഒപ്പം കൊണ്ടുവന്നായിരുന്നു അന്വേഷണ സംഘത്തിന്റെ പരിശോധന.

ഡിസിസി ഓഫീസിലെ മിനിട്സ് ബുക്കും ട്രഷറർ എന്ന നിലയിലെ ഒപ്പുകളും പരിശോധിച്ച രേഖകളില്‍പ്പെടുന്നു. ഇന്നലെ കെ കെ ഗോപിനാഥന്റെ വീട്ടില്‍ നിന്നും ചില രേഖകളും ഡയറികളും പോലീസ് കണ്ടെടുത്തിട്ടുണ്ട്. മുൻ ബാങ്ക് ചെയർമാൻ ആയിരുന്ന ഡോക്ടർ സണ്ണി ജോർജിന്റെ വീട്ടിലും അന്വേഷണ സംഘം പരിശോധന നടത്തി.

കേസുമായി ബന്ധപ്പെട്ട് കെപിസിസി പ്രസിഡന്‍റിനെയും വൈകാതെ അന്വേഷണസംഘം ചോദ്യംചെയ്യും. ആത്മഹത്യാ കുറിപ്പിനൊപ്പം വീട്ടുകാർ പൊലീസിന് നല്‍കിയ രണ്ട് കത്തുകള്‍ കെ സുധാകരനെ അഭിസംബോധന ചെയ്തായിരുന്നു. ഈ സാഹചര്യത്തിലാണ് കെപിസിസി പ്രസിഡന്‍റിനെ ചോദ്യം ചെയ്യാൻ അന്വേഷണസംഘം തീരുമാനിച്ചത്.

Tags:

enlightmedia,malayalamnews,kerala,latestnews