Massacre in the capital Postmortem of all five today

വെഞ്ഞാറമൂട്ടിലെ അരുംകൊലയില്‍ മരണപ്പെട്ട സല്‍മബീവി, അഫ്‌സാന്‍, ലത്തീഫ്, ഷാഹിദ, ഫര്‍സാന എന്നിവരുടെ പോസ്റ്റ്‌മോര്‍ട്ടം ഇന്ന് നടത്തും. ചികിത്സയിലുള്ള ഉമ്മ ഷെമിയുടെ നില അതീവ ഗുരുതരമാണ്. പ്രതി അഫ്‌നാന്റെ മൊഴി ഇന്നലെ രാത്രി വൈകി മജിസ്‌ട്രേറ്റ് രേഖപ്പെടുത്തിയിരുന്നു. തിരുവനന്തപുരം മെഡിക്കല്‍ കോളേജ് ആശുപത്രിയില്‍ വച്ചാണ് മൊഴി രേഖപ്പെടുത്തിയത്.

പ്രതി വിഷം കഴിച്ച സാഹചര്യത്തിലായിരുന്നു പൊലീസ് നടപടി. സാമ്പത്തിക ബാധ്യതയെ തുടര്‍ന്നാണ് കൂട്ടകൊല എന്നാണ് അഫ്‌നാന്‍ പൊലീസിന് നല്‍കിയ പ്രാഥമിക മൊഴി. ഇത് കേന്ദ്രീകരിച്ചാണ് പൊലീസ് അന്വേഷണം തുടരുന്നത്. ഇന്നലെ രാവിലെ 10 നും 6 നും ഇടയിലായിരുന്നു നാടിനെ നടുക്കിയ ക്രൂരകൊലപാതക പരമ്പര.

കേരളത്തെ നടുക്കിയ തിരുവനന്തപുരത്തെ കൂട്ടക്കൊലയില്‍ അഫ്‌നാനും പെണ്‍കുട്ടിയും തമ്മില്‍ ഉള്ള ബന്ധം പെണ്‍കുട്ടിയുടെ വീട്ടുകാര്‍ക്ക് അറിയാമായിരുന്നു എന്നായിരുന്നു ഫര്‍സാനയുടെ ബന്ധു താഹ പറയുന്നത്. വിവാഹത്തിന് വീട്ടുകാര്‍ക്ക് സമ്മതമായിരുന്നു. പ്രണയബന്ധം പെണ്‍കുട്ടി വീട്ടില്‍ പറഞ്ഞിരുന്നു. പെണ്‍കുട്ടി ഇന്നലെ വീട്ടില്‍ നിന്ന് ഇറങ്ങിയത് മൂന്നരയോടെയാണ്. ട്യൂഷന്‍ എന്ന് പറഞ്ഞാണ് വീട്ടില്‍ നിന്ന് ഇറങ്ങിയത്. അഫ്‌നാനൊപ്പം ബൈക്കില്‍ പോകുന്നത് കണ്ടിരുന്നുവെന്നും താഹ പറഞ്ഞു.