13-Year-Old Raped In Arabic College Hostel

തിരുവനന്തപുരം അറബിക് കോളേജ് ഹോസ്റ്റലില്‍ വിദ്ധ്യാര്‍ത്ഥിക്ക് നേരെ പീഡനം. 13 വയസ്സുള്ള ആണ്‍കുട്ടിയാണ് പീഡനത്തിന് ഇരയായത്. സംഭവത്തില്‍ കോളേജിലെ വൈസ് പ്രിന്‍സിപ്പല്‍ അടക്കം മൂന്ന് പേരെ പോലീസ് അറസ്റ്റ് ചെയ്തു. കോളേജിലെ വിദ്യാര്‍ത്ഥികളായ കിളിമാനൂര്‍ തട്ടത്തുമല സ്വദേശി ഷെമീര്‍ (24), കല്ലമ്പലം തോട്ടയ്ക്കാട് സ്വദേശി മുഹ്‌സിന്‍ (22), വിവരം മറച്ചുവെച്ചതിന് അറബിക് കോളെജ് വൈസ് പ്രിന്‍സിപ്പല്‍ കല്ലമ്പലം സ്വദേശി റഫീഖ് (54) എന്നിവരാണ് അറസ്റ്റിലായത്.

പീഡനത്തിനിരയായ തിരുവനന്തപുരം സ്വദേശിയായ വിദ്യാര്‍ത്ഥിയുടെ പരാതിയിലാണ് നടപടി. കല്ലമ്പലത്തിനു സമീപം പ്രവര്‍ത്തിക്കുന്ന അറബിക് കോളേജ് ഹോസ്റ്റലില്‍ താമസിച്ചിരുന്ന വിദ്യാര്‍ത്ഥിയാണ് പീഡനത്തിനിരയായത്. ഷെമീര്‍, മുഹ്‌സിന്‍ എന്നിവര്‍ ചേര്‍ന്നാണ് കുട്ടിയെ ഉപദ്രവിച്ചത്. സംഭവമറിഞ്ഞിട്ടും പൊലീസില്‍ അറിയിക്കാതിരുന്നതാണ് വൈസ് പ്രിന്‍സിപ്പലായ റഫീഖിന്റെ മേല്‍ ചുമത്തിയിട്ടുള്ള കുറ്റം. അതേസമയം ഇയാള്‍ കുട്ടിയെ മര്‍ദിച്ചതായും പരാതിയിലുണ്ട്.

ഹോസ്റ്റലില്‍നിന്നു വീട്ടിലെത്തിയ കുട്ടിയുടെ പെരുമാറ്റത്തില്‍ സംശയം തോന്നിയ വീട്ടുകാര്‍ അന്വേഷിച്ചപ്പോഴാണ് പീഡനവിവരം പുറത്തറിഞ്ഞത്. രക്ഷിതാക്കള്‍ കല്ലമ്പലം പൊലീസില്‍ പരാതി നല്കി. കുട്ടിയില്‍നിന്ന് മൊഴിയെടുത്ത പൊലീസ് കേസെടുക്കുകയും പ്രതികളെ അറസ്റ്റുചെയ്യുകയുമായിരുന്നു. പ്രതികളെ കോടതിയില്‍ ഹാജരാക്കും.