‘ഷഹബാസിനെ വീടിന് തൊട്ടടുത്തുള്ള സ്ഥലത്ത് കൂട്ടുകാർ ഇറക്കി വിടുകയായിരുന്നു’, അക്രമികൾക്ക് ക്രിമിനൽ പശ്ചാത്തലമുണ്ട്; അമ്മാവൻ

കോഴിക്കോട് താമരശ്ശേരിയില്‍ പത്താം ക്ലാസ്സുകാരന്‍ മുഹമ്മദ് ഷഹബാസിനെ അക്രമിച്ചതിന് പിന്നില്‍ മുതിര്‍ന്നവരുടെ പങ്ക് അന്വേഷിക്കണമെന്ന് അമ്മാവന്‍ നജീബ്. സംഭവം നടക്കുമ്പോള്‍ പ്രദേശത്ത് വിദ്യാര്‍ത്ഥികള്‍ അല്ലാതെ 5 മുതിര്‍ന്ന ആളുകളുടെ സാന്നിധ്യം കണ്ടെത്തിയിരുന്നു. അവര്‍ ആരൊക്കെയാണെന്നാണ് ഇപ്പോള്‍ അന്വേഷിക്കുന്നത്. അക്രമികളായ വിദ്യാര്‍ത്ഥികള്‍ക്ക് ക്രിമിനല്‍ പശ്ചാത്തലമുണ്ട്. വിദ്യാര്‍ത്ഥികളുടെ രക്ഷിതാക്കളും ക്രിമിനല്‍ പശ്ചാത്തലമുള്ളവരാണെന്നും നജീബ്് പറഞ്ഞു. ക്രിമിനലുകളില്‍ ഒരാളുടെ പിതാവ് പൊലീസ് ഡിപ്പാര്‍ട്ട്‌മെന്റിലെ ജീപ്പ് ഡ്രൈവറാണെന്നും ക്രിമനലുകള്‍ക്ക് ആയുധങ്ങള്‍ എവിടെ നിന്ന് കിട്ടി എന്നത് പരിശോധിക്കണം. ഞങ്ങളുടെ കുട്ടി നഷ്ട്ടമായി, ഇനി ആര്‍ക്കും ഈ ഗതികേട് ഉണ്ടാകരുതെന്നും അത് പൊലീസ് ഉറപ്പുനല്കിയിട്ടുള്ള കാര്യമാണെന്നും നജീബ് കൂട്ടിച്ചേര്‍ത്തു.

ഷഹബാസിനെ സംഭവ ശേഷം കൂട്ടുകാര്‍ തന്നെയാണ് വീട്ടില്‍ കൊണ്ടുവന്നിറക്കിയത്. വീടിന് തൊട്ടടുത്തുള്ള സ്ഥലത്താണ് കൂട്ടുകാര്‍ ഇറക്കിവിട്ടത്. വീട്ടില്‍ വന്ന ഷഹബാസ് തലവേദനയാണെന്ന് പറഞ്ഞാണ് റൂമിലേക്ക് കയറിപോയതെന്നും പിന്നീട് കൂട്ടുകാരെ വിളിച്ച് കാര്യം അന്വേഷിച്ചപ്പോഴാണ് അടിപിടിയുടെ കാര്യം പറയുന്നത്. അതേസമയം തന്നെയാണ് ഷഹബാസ് ഛര്‍ദ്ദിക്കുന്നത്. താലൂക്ക് ആശുപത്രിയില്‍ എത്തിച്ചെങ്കിലും പരുക്ക് ഗുരുതരമായതിനാല്‍ കോഴിക്കോട് മെഡിക്കല്‍ കോളജിലേക്ക് കുട്ടിയെ മാറ്റണം എന്നാണ് ഡോക്ടര്‍മാര്‍ നിര്‍ദേശിച്ചിരുന്നത് നജീബ് പറഞ്ഞു.

ട്യൂഷന്‍ സെന്ററിലെ പരിപാടിയുമായി ബന്ധപ്പെട്ടുള്ള സംഭവങ്ങളുടെ തുടര്‍ച്ചയായാണ് ഷഹബാസിന് നേരെയുണ്ടായ ഈ ആക്രമണം എന്നാണ് വിശ്വസിക്കുന്നത്.വിഷയത്തില്‍ സമഗ്രമായ അന്വേഷണം വേണമെന്നും കുടുംബം ആവശ്യപ്പെട്ടു. അടിയുടെ ആഘാതത്തില്‍ ഷഹബാസിന്റെ തലച്ചോറിന് 70% ആണ് ഗുരുതരമായി പരുക്കേറ്റിരുന്നത്. ആശുപത്രിയില്‍ പ്രവേശിപ്പിച്ച കുട്ടി കോമയില്‍ വെന്റിലേറ്ററിന്റെ സഹായത്തോടെയായിരുന്നു ജീവന്‍ നിലനിര്‍ത്തിയിരുന്നത്. ശേഷം രാത്രി 12 .30യോടുകൂടിയാണ് മരണം സ്ഥിരീകരിക്കുന്നത്.

അതേസമയം, അക്രമിസംഘത്തില്‍പ്പെട്ടവര്‍ പരസ്പരം സംസാരിക്കുന്ന ശബ്ദ സന്ദേശങ്ങള്‍ പുറത്തു വന്നിരുന്നു. ''ഷഹബാസിനെ കൊല്ലുമെന്ന പറഞ്ഞാല്‍ കൊന്നിരിക്കും'' എന്ന് ഇന്‍സ്റ്റാഗ്രാം വാട്‌സാപ്പ് ചാറ്റില്‍ പറയുന്നു.കൂട്ടത്തല്ലില്‍ മരിച്ചു കഴിഞ്ഞാല്‍ പ്രശ്‌നമില്ലെന്നും കേസെടുക്കില്ല പൊലീസ് എന്നും ?ഗ്രൂപ്പ് ചാറ്റില്‍ പറയുന്നു. ''ഷഹബാസിനെ കൊല്ലുമെന്ന പറഞ്ഞാല്‍ കൊന്നിരിക്കും'' എന്നും ചാറ്റില്‍ പറയുന്നു. ഷഹബാസിന്റെ കണ്ണൊന്ന് പോയി എന്നും ചാറ്റില്‍ വിദ്യാര്‍ത്ഥികള്‍ പരസ്പരം പറയുന്നുണ്ട്. ആസൂത്രണം ചെയ്ത് നടപ്പിലാക്കിയ മര്‍ദനം എന്ന ഷഹബാസിന്റെ പിതാവിന്റെ ആരോപണം ശരി വയ്ക്കുന്നതാണ് പുറത്തുവന്ന ശബ്ദ സന്ദേശം. എംജെ ഹയര്‍ സെക്കന്‍ഡറി സ്‌കൂളിലെ വിദ്യാര്‍ത്ഥികള്‍ വാട്‌സ്ആപ്പ്, ഇന്‍സ്റ്റാഗ്രാം ഗ്രൂപ്പ് ഉണ്ടാക്കി. ഇത് വഴിയാണ് സംഘര്‍ഷം ആസൂത്രണം ചെയ്തിരുന്നത്.

അഞ്ച് വിദ്യാര്‍ത്ഥികളെയാണ് പൊലീസ് ഇന്നലെ കസ്റ്റഡിയിലെടുത്ത്. കൂടുതല്‍ പേരെ സംഭവത്തില്‍ കസ്റ്റഡിയിലെടുക്കും. ഷഹബാസിനെ മര്‍ദിക്കുന്നതിന്റെ സിസിടിവി ദൃശ്യങ്ങള്‍ പുറത്തുവന്നിരുന്നു. മൂന്ന് തവണയാണ് വിദ്യാര്‍ത്ഥികള്‍ തമ്മില്‍ സംഘര്‍ഷം ഉണ്ടായത്. ഇതില്‍ ആദ്യത്തെ സ്ഥലത്ത് വെച്ച് നടന്ന സംഘര്‍ഷത്തിലാണ് മുഹമ്മദ് ഷഹബാസിന് ക്രൂരമായി മര്‍ദ്ദനമേറ്റത്. വട്ടം ചേര്‍ന്ന് മര്‍ദ്ദിക്കുകയായിരുന്നു. വിദ്യാര്‍ത്ഥികളുടെ പക്കല്‍ ആയുധങ്ങള്‍ ഉണ്ടായിരുന്നു. നഞ്ചക്ക്, ഇടിവള പോലുള്ള ആയുധങ്ങളുമായെത്തിയായിരുന്നു മര്‍ദ്ദനം.