കുറ്റിച്ചിറയിലെ വിജയത്തിന് പിന്നാലെ ഫാത്തിമ തഹ്ലിയക്കെതിരെ സോഷ്യൽ മീഡിയയിൽ വിദ്വേഷ പ്രചാരണം

കോഴിക്കോട്: കോഴിക്കോട് കോർപറേഷൻ കുറ്റിച്ചിറ വാർഡ് ഉപതെരഞ്ഞെടുപ്പിൽ യു.ഡി.എഫ് സീറ്റ് നിലനിർത്തിയതിന് പിന്നാലെ മുസ്ലിം യൂത്ത് ലീഗ് നേതാവും പേരാമ്പ്ര എം.എൽ.എയുമായ ഫാത്തിമ തഹ്ലിയക്കെതിരെ സോഷ്യൽ മീഡിയയിൽ അധിക്ഷേപകരമായ പരാമർശങ്ങളടങ്ങിയ പോസ്റ്റുകൾ. ഏതാനും ഫേസ്ബുക്ക് അക്കൗണ്ടുകളിൽ നിന്നാണ് ഇത്തരം പോസ്റ്റുകൾ പ്രചരിക്കുന്നത്. ഡിവൈഎഫ്ഐ നേതാവ് ചിന്താ ജെറോം ഉൾപ്പെടെയുള്ള നേതാക്കൾക്ക് ഇത്തരം ദുരനുഭവങ്ങളുടെ ചരിത്രമുണ്ട്. പൊതുവെ സാംസ്കാരിക ഔന്നത്യം അവകാശപ്പെടുന്ന കേരളത്തിൽ വളർന്നു വരുന്ന വനിതാ രാഷ്ട്രീയ നേതാക്കൾക്കെതിരെ പാർട്ടിഭേദമന്യേ വ്യക്തിപരമായ സൈബർ ആക്രണങ്ങൾ രൂക്ഷമാണെങ്കിലും വംശീയ സ്വഭാവത്തോടെയുള്ള ആക്രമണങ്ങളാണ് ഫാത്തിമക്കെതിരെ നിലയ്ക്കാതെ തുടരുന്നത്.

കുറ്റിച്ചിറയിൽ മുസ്‌ലിം ലീഗ് സ്ഥാനാർഥി ഫർസീന അറയ്ക്കൽ 436 വോട്ടിന്റെ ഭൂരിപക്ഷത്തിലാണ് വിജയിച്ചത്. ഫർസീനയ്ക്ക് 2,711 വോട്ടും എൽ.ഡി.എഫ് സ്ഥാനാർഥി ടി.ടി. ജംഷീനയ്ക്ക് 2,275 വോട്ടും ലഭിച്ചു. കഴിഞ്ഞ തദ്ദേശ തെരഞ്ഞെടുപ്പിൽ ഫാത്തിമ തഹ്ലിയ 2,273 വോട്ടിന്റെ ഭൂരിപക്ഷത്തിൽ വിജയിച്ച വാർഡിലാണ് ഇത്തവണ യു.ഡി.എഫിന്റെ ഭൂരിപക്ഷം 436 ആയി കുറഞ്ഞത്. ഫലം പുറത്തുവന്നതിന് പിന്നാലെയാണ് ഫാത്തിമ തഹ്ലിയയെ വ്യക്തിപരമായി ലക്ഷ്യമിട്ടുള്ള ചില സോഷ്യൽ മീഡിയ പോസ്റ്റുകൾ ശ്രദ്ധയിൽപ്പെട്ടത്. ‘തട്ടമിട്ട ശശികല 2274 വോട്ടിനു ജയിച്ച കുറ്റിച്ചിറ 436 വോട്ടിനു ഭൂരിപക്ഷത്തിന് ജയിച്ചിരിക്കുന്നു’ എന്ന തരത്തിലുള്ള വിദ്ദ്വേഷ പരിഹാസ പരാമർശമാണ് ഒരു ഫേസ്ബുക്ക് അക്കൗണ്ടിൽ പ്രത്യക്ഷപ്പെട്ടത്. മറ്റൊരു അക്കൗണ്ടിൽ ഫാത്തിമ തഹ്ലിയയുടെ മുൻ ഭൂരിപക്ഷത്തിലെ 1,837 വോട്ടിന്റെ കുറവ് ചൂണ്ടിക്കാട്ടി അധിക്ഷേപകരമായ ഭാഷയിൽ പ്രതികരിക്കുന്നുണ്ട്.

മറ്റൊരു പോസ്റ്റിൽ, ഫാത്തിമ തഹ്ലിയയും യു.ഡി.എഫ് നേതൃത്വവും നടത്തിയ തെരഞ്ഞെടുപ്പ് പ്രചാരണത്തെ പരിഹസിക്കുകയും സംസ്ഥാന സർക്കാരിനെതിരായ രാഷ്ട്രീയ വിമർശനങ്ങൾ ഉന്നയിക്കുകയും ചെയ്തിട്ടുണ്ട്. ബന്ധപ്പെട്ട അക്കൗണ്ടുകളിൽ എൽ.ഡി.എഫ് അനുകൂലമായ മറ്റ് രാഷ്ട്രീയ പോസ്റ്റുകളും കാണാം. അതേസമയം, ഈ സോഷ്യൽ മീഡിയ അക്കൗണ്ടുകളുടെ ഉടമസ്ഥത, പലപ്പോഴും സജീവ രാഷ്ട്രീയ പ്രവർത്തകരുടേതല്ല. ഒരു പോസ്റ്റിൽ അക്കൗണ്ട് ഉടമ ഖത്തറിൽ ജോലി ചെയ്യുന്നതായി അവകാശപ്പെടുന്നുണ്ട്. . കുറ്റിച്ചിറയിലെ വോട്ടുചിത്രം സംബന്ധിച്ച് രാഷ്ട്രീയ ചർച്ചകളും ഇതിനകം സജീവമാണ്. യു.ഡി.എഫ് സീറ്റ് നിലനിർത്തിയെങ്കിലും ഭൂരിപക്ഷം 2,273ൽ നിന്ന് 436 ആയി കുറഞ്ഞു. കഴിഞ്ഞ തവണ 1,467 വോട്ടുണ്ടായിരുന്ന എൽ.ഡി.എഫിന്റെ വോട്ട് ഇത്തവണ 2,275 ആയി ഉയർന്നപ്പോൾ യു.ഡി.എഫിന്റെ വോട്ട് 3,740ൽ നിന്ന് 2,711 ആയി കുറഞ്ഞു. പോളിങ് ശതമാനത്തിലും കുറവുണ്ടായി; ഇത്തവണ 54.38 ശതമാനമായിരുന്നു പോളിങ്. 

ഭൂരിപക്ഷം കുറഞ്ഞതിന്റെ കാരണങ്ങൾ പരിശോധിക്കുമെന്ന് മുസ്‌ലിം ലീഗ് ജില്ലാ ജനറൽ സെക്രട്ടറി ടി.ടി. ഇസ്മായിൽ വ്യക്തമാക്കിയിട്ടുണ്ട്. വോട്ടിങ് ശതമാനം കുറഞ്ഞതാണ് ഭൂരിപക്ഷം കുറയാനുള്ള കാരണമെന്നാണ് അദ്ദേഹത്തിന്റെ പ്രതികരണം. ഇത് ജില്ലാ ലീഗ് നേതൃത്വത്തിന്റെ പരാജയമായി വിലയിരുത്തപ്പെടുന്നുണ്ട്.