തിരുവനന്തപുരം-ഡൽഹി രാജധാനി എക്‌സ്പ്രസിന് തീപിടിച്ചു

ന്യൂസ് ഡെസ്ക്, എൻലൈറ്റ് മീഡിയ

ന്യൂഡൽഹി/കോട്ട: തിരുവനന്തപുരത്ത് നിന്നും ഹസ്രത് നിസാമുദ്ദീനിലേക്ക് (ഡൽഹി) പുറപ്പെട്ട രാജധാനി എക്സ്പ്രസ് ട്രെയിനിൽ (Train No: 12431) വൻ തീപിടിത്തം. ഞായറാഴ്ച പുലർച്ചെ 5.15-ഓടെ വെസ്റ്റ് സെൻട്രൽ റെയിൽവേയുടെ കോട്ട ഡിവിഷന് കീഴിലുള്ള ലൂണി റിച്ചാ - വിക്രംഗഡ് അലോട്ട് സ്റ്റേഷനുകൾക്കിടയിലാണ് സംഭവം. ട്രെയിനിന്റെ എയർ കണ്ടീഷൻഡ് ബി-വൺ (B-1) കോച്ചിലാണ് ആദ്യം തീപിടിത്തമുണ്ടായത്. കൃത്യസമയത്ത് യാത്രക്കാരെ ഒഴിപ്പിക്കാൻ കഴിഞ്ഞതിനാൽ വൻ ദുരന്തമാണ് ഒഴിവായത്. മലയാളി യാത്രക്കാർ ഉൾപ്പെടെ ട്രെയിനിലുണ്ടായിരുന്ന മുഴുവൻ പേരും സുരക്ഷിതരാണെന്ന് റെയിൽവേ അധികൃതർ അറിയിച്ചു.

ഉറക്കത്തിനിടയിൽ ആളിപ്പടർന്ന തീ; രക്ഷകനായി ഗാർഡ്

വെള്ളിയാഴ്ച രാത്രി തിരുവനന്തപുരത്ത് നിന്ന് യാത്ര തിരിച്ച്, ഞായറാഴ്ച ഉച്ചയോടെ ഡൽഹിയിൽ എത്തേണ്ടതായിരുന്നു ട്രെയിൻ. പുലർച്ചെ യാത്രക്കാരിൽ ഭൂരിഭാഗം പേരും നല്ല ഉറക്കത്തിലായിരുന്ന സമയത്താണ് എഞ്ചിന് തൊട്ടുപിന്നിലെ എസി കോച്ചായ ബി-വണ്ണിൽ നിന്ന് പുക ഉയർന്നത്.

തുടർന്ന് തീ ആളിപ്പടരുന്നത് ശ്രദ്ധയിൽപ്പെട്ട ട്രെയിൻ ഗാർഡ് ഉടൻ തന്നെ ലോകോ പൈലറ്റിനെ വിവരമറിയിക്കുകയും ട്രെയിൻ അടിയന്തരമായി നിർത്തിക്കുകയുമായിരുന്നു. സെക്കൻഡുകൾക്കുള്ളിൽ തീ കോച്ചിലേക്ക് പടർന്നു പിടിച്ചെങ്കിലും റെയിൽവേ ജീവനക്കാരും ആർ.പി.എഫും ചേർന്ന് 15 മിനിറ്റിനുള്ളിൽ തന്നെ ബി-വൺ കോച്ചിലുണ്ടായിരുന്ന 68 യാത്രക്കാരെയും സുരക്ഷിതമായി പുറത്തിറക്കി.

എഞ്ചിനും ബോഗിയും വേർപെടുത്തി; രക്ഷാപ്രവർത്തനം ദ്രുതഗതിയിൽ

തീ മറ്റ് കോച്ചുകളിലേക്ക് പടരാതിരിക്കാൻ റെയിൽവേ ഉദ്യോഗസ്ഥർ അതീവ ജാഗ്രത പുലർത്തി. അപകടം നടന്നയുടൻ തന്നെ ട്രാക്കിലേക്കുള്ള വൈദ്യുതി ബന്ധം (OHE Supply) വിച്ഛേദിച്ചു. തുടർന്ന് തീപിടിച്ച ബി-വൺ കോച്ചും എഞ്ചിൻ ഭാഗവും മറ്റ് ബോഗികളിൽ നിന്നും വേർപെടുത്തുകയായിരുന്നു (Detach). കോട്ട റെയിൽവേ ഡിവിഷനിൽ നിന്നുള്ള പ്രത്യേക ദുരന്തനിവാരണ-രക്ഷാസേനയും അഗ്നിശമന യൂണിറ്റുകളും ഉടൻ തന്നെ സ്ഥലത്തെത്തി തീയണയ്ക്കാനുള്ള നടപടികൾ സ്വീകരിച്ചു.

മലയാളി യാത്രക്കാർ സുരക്ഷിതർ; ബദൽ സംവിധാനം

വേനലവധി കഴിഞ്ഞ് ഡൽഹിയിലേക്ക് മടങ്ങുകയായിരുന്ന നിരവധി മലയാളി കുടുംബങ്ങൾ ട്രെയിനിലുണ്ടായിരുന്നു. ഭീതിജനകമായ സാഹചര്യമായിരുന്നെങ്കിലും ആർക്കും പരിക്കേൽക്കുകയോ മറ്റ് അപായങ്ങൾ സംഭവിക്കുകയോ ചെയ്തിട്ടില്ലെന്ന് കോട്ട റെയിൽവേ പി.ആർ.ഒ രവീന്ദ്ര ലഖേര സ്ഥിരീകരിച്ചു.

തീപിടിത്തത്തെ തുടർന്ന് ഡൽഹി - മുംബൈ റെയിൽ പാതയിലെ ഗതാഗതം രണ്ട് മണിക്കൂറോളം തടസ്സപ്പെട്ടു. ബി-വൺ കോച്ചിലെ യാത്രക്കാരെ കോട്ട സ്റ്റേഷൻ വരെ എത്തിക്കുന്നതിനായി ട്രെയിനിലെ മറ്റ് കോച്ചുകളിൽ താൽക്കാലിക സൗകര്യം ഒരുക്കിയിട്ടുണ്ട്. ഇവിടെ നിന്നും യാത്രക്കാർക്ക് ഡൽഹിയിലേക്ക് തുടരാൻ ബദൽ കോച്ചുകൾ റെയിൽവേ സജ്ജമാക്കും.

അപകടത്തിന്റെ യഥാർത്ഥ കാരണം വ്യക്തമായിട്ടില്ല. ഷോർട്ട് സർക്യൂട്ടാണോ തീപിടിത്തത്തിന് വഴിവെച്ചതെന്ന് കണ്ടെത്തുന്നതിനായി റെയിൽവേ ഉന്നതതല അന്വേഷണം പ്രഖ്യാപിച്ചിട്ടുണ്ട്.